Wis rodo suwe ora ngerasakne anyes'e embun ing wayah isuk. Naliko srengenge durung katon irunge, hamung poro simbok-simbok  katon jumangkah lumaku menyang pasar karo nggendong rinjing sing kebak terong, pete lan kelopo. Mestine arep didol menyang pasar gawe tuku bumbon brambang, bawang, tempe bosok ugo terasi. Mumpung ora udan, tak gelak atiku kanggo endang-endang kali brantas sing naliko semono dadi saksi anggenku blajar nglangi. Tumekan kali brantas, kumriyak'e banyu kali soyo gawe tentreming ati.  

Masio kali Brantas ora elok koyo  Kali-kali ing sak njabane mblitar, hananging wis tanpo keno selak menowo kali brantas pranyoto dadi salah sawijining sumber panguripan pirang-pirang warga. Luput banyune, watu sak wedine keno digawe adek omah utowo gedung nang kutho mblitar. Iku durung iwake sing keno dipancing ugo dijaring gawe lawuh sarapan utowo daharan. Dene olehe iwak linuwih iso didol nang pasar kanggo tetukon samubarang!

Tolah-toleh ing sapinggiri kali, enek ae tanduran sing katon seger anggene jujur terus memayung lemah pinggir kali brantas. Sak dawane lemah pinggir kali, katon ijo royo-royo dening suket gajah. Suket gajah utowo kolonjono ancene sengojo ditandur nang kono. Kolo-kolo katon tanduran telo masio arang-arang. Ning godonge sing kebak embun, nambahi kemayu ndadekne sopo wae pingin metik kanggo urap-urap utowo kulupan. Mestne ora kabeh wong doyan, tapi godong telo dadi salah sawijining sayur andalan kanggo wong ndeso.

Rodo munggah titik, ndilalah ketemu Putri. Klambine ijo pupus, nggawe mahkota ungu. Tansoyo katon lek kemayu. Tak cedaki, ora kuat aku nahan pepinginan nggepok badane. Eh.. deweke isin terus mingkup, klambine nyiut, awake katon ringkih. Ning tetep indah mahkotane sing ungu. Sopo to? Kuwi lho, Putri Malu! Nek cah pinggir kali Putri Malu kuwi dijenengi BISKUCING.

Munggah maneh, nemoni wit sing sering digawe puisi poro pujangga. Dunia Tak Selebar Daun Kelor. Nek diwaspadakne ancene godonge cilik tur ciut. Tak cedaki, deweke katon mesem ing sela-selane wit jarak lan lamtoro. Godonge sik utuh, koyoke durung konangan wong sing golek ramban gawe pakan wedus!